Mic 5 | JAE | STEP | Galoc tuŋbôm kêkwa aôm auc ma ŋacjo sêgi aôm auc. Êsêac si Israelnêŋ gôliŋwaga alianô ŋa tôc.

Micah 5

1 Galoc tuŋbôm kêkwa aôm auc ma ŋacjo sêgi aôm auc.
Êsêac si Israelnêŋ gôliŋwaga alianô ŋa tôc.

Kêsiwaga taŋ oc êsa aŋga Betlehem naŋ, nê gôliŋ

2 Mago aôm Betlehem Eprata,
aôm gôlôac Judaŋa nêŋ toŋ sauŋanô teŋ,
aêŋoc ŋac, taŋ êtu Israelnêŋ gôliŋwaga naŋ, mêŋêsa aŋga aôm.
Ênê ŋam kêsêp têm laŋgwaanô to bêc andaŋgeŋŋa.
3 Kêtu tonaŋŋa Apômtau oc êwi êsêac siŋ e êndêŋ têm,
taŋ awê tau, taŋ ŋapalê kêtuŋ eŋ naŋ, êkôc ŋapalê su.
Go ŋapalênê lasitêwai ŋagêdô oc sêmu dêndêŋ Israel latui sêmêŋ êtiam.
4 Go eŋ êndi êkô ma êlôm nê domba ŋatoŋ,
gebe Apômtaunê ŋaclai ênam eŋ auc to Apômtau Anôtô nê ŋaê ŋawasi êpuc eŋ tôŋ.
Ma êsêac oc sêŋgôŋ ŋaŋêŋ êsa,
gebe ênê ŋaclai esewec e naêndêŋ nom ŋamadiŋ.

Sêjam kêsi to sêkêŋ ŋagêjô

5 Êndêŋ taŋ lau Asur sêsa aêacnêŋ gamêŋ sêmêŋ
ma eŋkaiŋ êka aêacnêŋ kôm tôŋ naŋ,
aêac takêŋ nêŋ laugejob 7 to nêŋ kasêga 8 sêkô êsêac auc.
6 Êsêac oc sênam gôliŋ gamêŋ Asuria ŋa siŋ
ma Nimrodnê gamêŋ ŋa siŋ ŋamata,
ma êndêŋ taŋ lau Asur sêsa aêacnêŋ gamêŋ sêmêŋ
ma sêŋgêli aêacnêŋ nom ŋamadiŋ naŋ,
êsêac oc sênam aêac kêsi aŋga Asur lemeŋ.

7 Go Jakobnê lau ŋapopoc oc sêmoa lau tomôkê-tomôkê ŋalêlôm
têtôm maniŋ, taŋ kêsêp aŋga Apômtaunê gêmêŋ naŋ,
ma têtôm kom, taŋ kêmoasiŋ gêgwaŋ naŋ,
gêŋ tau gêôŋ ŋamalac to kêsaê ŋamalac latui atom.
8 Ma Jakobnê lau ŋapopoc oc sêmoa lau tomôkê-tomôkê ŋalêlôm
têtôm lewe teŋ gêmoa bôc saleŋŋa ŋalêlôm,
têtôm lewe wakuc teŋ gêmoa domba ŋatoŋ ŋalêlôm.
Lewe embe êô lasê, go êka tôŋ
ma êkac êŋgic-êŋgic
ma ŋac teŋ gebe ênam kêsiŋa gêmoa atom.
9 Amac lemem akôniŋ nêm soŋo-soŋo tôŋ
ma nêm ŋacjo samob oc sênaŋa.

10 Apômtau kêsôm gebe
“Êndêŋ bêc tônê aê oc janseŋ nêm hos su
ma jatuc nêm kareta siŋŋa popoc.
11 Aê oc janseŋ malac kapôêŋ su aŋga nêm gamêŋ
ma jaku nêm malac ŋajaŋa tulu.
12 Aê oc janseŋ nêm mectomaŋ su aŋga amac lemem
ma nêm lau-seoc-biŋ-lasêwaga oc maleŋmê.
13 Aê oc janseŋ nêm gwam to nêm alê gwam su aŋga amac ŋalêlôm
ma apôŋ emduc êndêŋ lemem ŋakôm êtiam atom.

14 Aê oc jambuc nêm anôtôonê ŋakatu sa
ma janseŋ nêm malac kapôêŋ su.
15 Ma aê oc jamêtôc tenteŋlatu samob, taŋ sêkêŋ taŋeŋ aê atom naŋ,
toŋoc têtac ŋandaŋ ma totêtac êmbôli aucgeŋ.”